ក្រោយពីចប់កម្មអំណានយុវជន-បាត់ដំបង ជំនាន់ទី១ ខ្ញុំនៅតែអាន

១. សូមគោរពជម្រាបសួរ​! មួយរយៈកាលនេះសម្រាប់ខ្ញុំផ្ទាល់ គឺសុខសប្បាយធម្មតាតាមបែបអ្នកដែលស្នាក់នៅផ្ទះ គឺរៀនតាមអនឡាញផង និងធ្វើការផ្ទះផង ។

២. ក្រោយពីខ្ញុំបានចូលរួមកម្មវិធីអំណានយុវជន-ខេត្តបាត់ដំបងរួចមក ខ្ញុំបានកែប្រែទម្លាប់ជាច្រើន ហើយអ្វីដែលបានផ្លាស់ប្ដូរខ្ញុំយ៉ាងពិសេសបំផុតនោះ គឺការអានសៀវភៅ។ ខ្ញុំបានផ្លាស់ប្ដូរពីទម្លាប់នៃការអានសៀវភៅមួយក្បាលឲ្យបានត្រឹមតែចប់ ដោយមិនបានគិតស៊ីជម្រៅទៅលើខ្លឹមសារនៃសៀវភៅ ទៅជាការអានដើម្បីស្វែងយល់ពីខ្លឹមសារនៃសៀវភៅ ហើយគិតពិចារណាស៊ីជម្រៅទៅលើខ្លឹមសារនៃអត្ថបទមួយ ថាគេចង់និយាយអំពីអ្វី ហើយខ្ញុំចេះសរសេរសង្ខេបបង្រួមន័យខ្លឹមសារអត្ថបទ ក៏ដូចជាមានភាពជឿជាក់ក្នុងការចែករំលែកទៅកាន់សមាជិកទាំងអស់ ជាពិសេសនោះ គឺខ្ញុំមានឱកាសបានស្គាល់ជាមួយនឹងអ្នកនិពន្ធ វាគ្មិនល្អៗ ដែលបានចូលរួមក្នុងកម្មវិធីទៀតផង។ ខ្ញុំបានបង្កើតទំនាក់ទំនងល្អជាមួយសមាជិក និងស្គាល់មនុស្សជាច្រើនជាងមុននៅក្នុងកម្មវិធីនេះ។

៣ . ការដែលអាចកែប្រែទម្លាប់អាក្រក់ទៅជាទម្លាប់ល្អបានគឺវាត្រូវឆ្លងកាត់ការអនុវត្តជាបន្តបន្ទាប់ និងការហ្វឹកហាត់ជារៀងរាល់ថ្ងៃ ទើបធ្វើឲ្យទម្លាប់អាក្រក់អាចលុបបំបាត់ ហើយបង្កើតបានជាទម្លាប់ល្អថ្មីផ្សេងទៀត។ ការអានសៀវភៅក៏ដូចគ្នាដែរ គឺយើងត្រូវឆ្លងកាត់ការហ្វឹកហាត់រាល់ថ្ងៃ ទើបយើងអាចបង្កើតទម្លាប់ល្អនៅក្នុងការអាន ។ ចំពោះរូបខ្ញុំ បន្ទាប់ពីបានអានសៀវភៅ ឬក៏អានខ្លឹមសារនៃអត្ថបទមួយ ខ្ញុំតែងតែយកចំណេះដឹង ឬបទពិសោធន៍ ដែលខ្ញុំទទួលបានពីការអាន ទៅប្រើប្រាស់ក្នុងជីវភាពរស់នៅប្រចាំថ្ងៃ ព្រោះថាជីវិតមួយនេះគឺជាការរៀនសូត្រដែល រៀនមិនចេះចប់ឡើយ។

៤ . នៅក្នុងស្ថានភាពកូវីត19 នេះ គឺយើងទាំងអស់គ្នាបានឆ្លងកាត់នូវដំណាក់កាលមួយដែលពិបាក ហើយវាជារឿងមួយដែលយើងត្រូវរៀនសូត្រទាំងអស់គ្នាផងដែរ។ ក្នុងដំណាក់កាលដែលប្រទេសកម្ពុជាស្ថិតនៅក្នុងស្ថានភាពកូវីត19  សូមឱ្យប្រជាជនកម្ពុជាទាំងអស់រួចផុតពីជំងឺមួយនេះដោយគោរពតាមអនុសាសន៍របស់សម្ដេចសេនាបតីតេជោហ៊ុនសែន នាយករដ្ឋមន្រ្តីនៃព្រះរាជាណាចក្រកម្ពុជាដែលចេញនូវវិធានការ បីកុំបីការពារ ។ ក្នុងស្ថានភាពនេះយើងទាំងអស់គ្នាគួរតែរៀន និងអភិវឌ្ឍសមត្ថភាពខ្លួនឯង ព្រោះថាពេលវេលាបានដើរទៅមុខជានិច្ចមិនចាំយើងឡើយ។

កញ្ញា ហ៊ា អ៊ីឃុន

តាមដានពួកយើង

គាំទ្រសកម្មភាពពួកយើងតាមរយៈ

ទំព័រទាំងអស់