“ព្រឹត្តិការណ៍ សម្ពោធសៀវភៅ” គឺកម្មវិធីមួយដែលស្ថិតក្រោមគម្រោងរបស់ “អំណានយុវជន”។ បេសកកម្មរបស់យើងគឺ រៀបចំជាវេទិកាមួយនេះ ដើម្បីផ្ដល់ឱកាសរវាងអ្នកអាន និងអ្នកនិពន្ធ បានជួបជជែកដេញដោលគ្នាអំពី ស្នាដៃដែលទើបតែចេញផ្សាយថ្មី។ ក្រៅពីនេះអ្នកនិពន្ធក៏អាចចែករំលែកចំណេះដឹង បទពិសោធផ្សេងៗ ព្រមទាំងមានឱកាសមួយ បានផ្សព្វផ្សាយស្នាដៃថ្មីរបស់ខ្លួនទៅកាន់សាធារណជនផងដែរ។ 

កាលពីថ្ងៃពុធ ទី០៧ ខែធ្នូ ឆ្នាំ២០១៩ កន្លងទៅនេះ អំណានយុវជន បានសហការជាមួយគ្រឹះស្ថានសៀវភៅជីវិត រៀបចំនូវកម្មវិធីសម្ពោធសៀវភៅពីរចំណងជើង ទី១គឺសៀវភៅដំណើរ ដែលជាស្នាដៃសហនិពន្ធ រវាង លោកឡាំ លីម កញ្ញា សែត ហត្ថា និង កញ្ញា ថុន ថាវរី។ និង ទី២ គឺសៀវភៅទន្សាយជានរណា? ដែលជាស្នាដៃរបស់ អ្នកនិពន្ធ ម៉ៅសំណាង រហ័សនាម អ្នកនិពន្ធទន្សាយ។ 

ក្រោមប្រធានបទ “ចុងប៊ិកបីដើមគោលគំនិតមួយ” ដែលមានសម្របសម្រួល ដោយលោក ឡាំឡាយ និងវាគ្មិនចំនួន៤រូប ដែលជាម្ចាស់ស្នាដៃខាងលើព្រមទាំង កញ្ញា ម៉ៅ ចន្ទរស្មី ជាកូនស្រីបង្កើតរបស់ អ្នកនិពន្ធ ម៉ៅ សំណាង បានមកចូលរួមជាវាគ្មិនជំនួសអ្នកម្ដាយ។ មិនតែប៉ុណ្ណោះ ព្រឹត្តិការណ៍នេះ ក៏មាន វត្តមានចូលរួមពីសំណាក់យុវនិពន្ធ អ្នកនិពន្ធ និងបណ្ណាគារ អេឡិចត្រូនិច (eLibrary )មួយចំនួនផងដែរ។ 

កម្មវីធីនេះ បានប្រព្រឹត្តទៅ ដោយមានប្រិយមិត្តចូលរួមប្រមាណជា២០០នាក់ លើទឹកដីរាជធានីភ្នំពេញ ក្នុងសាលប្រជុំនៃសាកលវិទ្យាល័យ ផារ៉ាហ្គនអន្តរជាតិ។ រឹតតែពិសេសអ្នកចូលរួមទាំងអស់ ក៏ទទួលបានសៀវភៅ “អំណានជាអំណាច” របស់លោក ឡាំ លីម ម្នាក់មួយក្បាល ដោយឥតគិតថ្លៃផងដែរ។

ជាចុងក្រោយ រូបភាពព្រឹត្តិការណ៍អំណានមួយនេះ នឹងក្លាយជាចំណងអនុស្សាវរីយ ពញ្ញាក់អារម្មណ៍បងប្អូនថា “យើងជាផ្នែកមួយដ៏សំខាន់សម្រាប់កម្ពុជា ហើយត្រូវកាន់សៀវភៅអានសម្រាប់កសាងខ្លួនឯង”។ អំណានយុវជន នឹងព្យាយាមលើកយកព្រឹត្តិការណ៍ អំណានផ្សេងៗមួយចំនួនទៀត ដើម្បីបង្កើតស្នាមញញឹម និងជំរុញទឹកចិត្តបងប្អូន ឱ្យនឹករម្លឹកគ្នា។ ដោយក្ដីស្រឡាញ់ និងនឹករម្លឹក។ កុំភ្លេចអាន៕

ព្រឹត្តិការណ៍សម្ពោធសៀវភៅ ដំណើរ និងសៀវភៅទន្សាយជានរណា?

តាមដានពួកយើង

គាំទ្រសកម្មភាពពួកយើងតាមរយៈ

ទំព័រទាំងអស់